II “Fantaziya” festivalı çərçivəsində “Dünya ətrafında memarlığa baxış” adlı fotosərgi. Ölkə iştirakçıları: İspaniya, Tacikistan, Argentina
02.11.2019 - 08.11.2019Sərginin açılış mərasimi: 02 noyabr 18:30
Sərgi Qalereyası
Təşkilatçılar: Avropa İttifaqının Azərbaycandakı Nümayəndəliyi, Muzey Mərkəzi
02 noyabr 2019-cu il , saat 18.30 Azərbaycan Respublikası Mədəniyyət Nazirliyinin Muzey Mərkəzinin Sərgi Qalereyasında Avropa İttifaqının Azərbaycandakı Nümayəndəli-yinin təşkilatçılığı ilə “Fantaziya” II Mədəni İrs Festivalı çərçivəsində “Dünya memarlığına baxış” adlı fotosərginin açılış mərasimi baş tutacaqdır. İştirakçı ölkələr: Argentina, İspaniya və Tacikistandır.
Avropa İttifaqının Azərbaycandakı Nümayəndəliyi 1-15 noyabr 2019-cu il tarixlərində Bakıda, Gəncədə və Qəbələnin Nic kəndində 2-ci "Fantazia" mədəni irs festivalı keçirəcək. Məşhur Bakı hamamının mühafizə olunan binasının şərəfinə adlandırılan "FANTAZİA" festivalının məqsədi mədəni irsin nümayişi və qorunması zəruriliyi barədə məlumatlılığın artırılmasıdır. Bu il festival "Şərq Tərəfdaşlığı"nın 10 illik yubileyi ilə üst-üstə düşür.
Festival, Avropa İttifaqına üzv dövlətlər və üçüncü ölkələrlə, o cümlədən Fransa, Bolqarıstan, İtaliya, Latviya, Finlandiya, Belçika, Hollandiya, Macarıstan, Moldova, Meksika, Argentina, Tacikistan, Venesuela ilə, həmçinin aralarında Azərbaycan Mədəniyyət Nazirliyi, Bakı Şəhər Mədəniyyət Baş İdarəsi, "İçərişəhər" Dövlət Tarix-Memarlıq Qoruğu İdarəsinin də olduğu yerli tərəfdaşlarla birgə təşkil olunacaq.
Festival 1 noyabr tarixində Azərbaycan Fransız Universitetində təşkil olunacaq Memarlıq İrsinə həsr olunmuş Konfrans və Bakının tarixinə həsr olunmuş pop-up muzeyin açılış tədbiri ilə başlayacaq, müxtəlif fotosərgilər, film nümayişləri, konsert və teatr tamaşaları, universitetdə master-klasslarla davam edəcək. Bu münasibətlə Bakıya 10-dan çox xarici qonaq gələcək.
Festivalın bir hissəsi, daha dəqiq desək, sərgilərin, debatların və film nümayişlərinin təşkili Gəncədə baş tutacaq. Festival çərçivəsində qonaqlar həmçinin Qəbələ rayonunun Nic kəndində təşkil olunacaq Alban-Udi Mədəniyyət Günündə də iştirak edəcəklər.
Festival "The Landmark" otel və biznes mərkəzinin dəstəyi ilə keçirilir. Tədbirin rəsmi tərəfdaşları: "YARAT" Müasir İncəsənət Məkanı, Muzey Mərkəzi, Azərbaycan Milli Xalça Muzeyi, "Salaam Cinema", Gəncə Şəhər İcra Hakimiyyəti, Alban-Udi Xristian dini icması, AEDOS, Barselona Casa Battlo. Elmi tərəfdaşlar: Ka' Foskari Venesiya Universiteti, Azərbaycan Dövlət Mədəniyyət və İncəsənət Universiteti (ADMİU), Azərbaycan-Fransız Universiteti (UFAZ), Gəncə Dövlət Universiteti. "United Cultures" Avropa İttifaqı tərəfindən maliyyələşdirilən müqavilə çərçivəsində təşkilati dəstək göstərir. Sərgi 8 noyabr tarixinədək davam edəcək.
