Azərbaycan Respublikası
Mədəniyyət və Turizm
Nazirliyinin Muzey Mərkəzi

Azərbaycan Respublikası Mədəniyyət və Turizm Nazirliyinin Muzey Mərkəzi şəhərin mərkəzində və Dənizkənarı Milli Parkın (Neftçilər pr.123ª) lap yaxınlığında yerləşir.Muzey Mərkəzinin binası dördmərtəbəlidir, ümumi sahəsi 46.800 m³-dir. Binanın layihəsi memar Həsən Məcidov tərəfindən işlənib və Kommunist partiyasının dahi rəhbəri V.İ.Leninin yubileyi üçün 1961-ci ildə Moskva Lenin Muzeyinin filialı kimi istifadəyə verilib. O zaman bu, respublikada muzey üçün inşa edilmiş yeganə bina idi. Bu bina dövlət tərəfindən qorunan ən maraqlı memarlıq abidəsi sayılırdı. Fasad milli ornamentlərlə bəzədilib və enli pilləkənlər və möhtəşəm sütunlar onun əzəmətini artırır.

1991-ci ildə Sovetlər İttifaqının süqutundan sonra bina Mədəniyyət Nazirliyinə verildi və Muzey Mərkəzi adını aldı. Son illər Muzey Mərkəzi şəhərimizin fəal ziyarət olunan mədəniyyət mərkəzinə çevrildi və müxtəlif tədbirlərin keçirilməsi üçün ən sevimli yerlərdən biri oldu.

Hal-hazırda binada üç muzey yerləşir: Azərbaycan Xalçası və Xalq Tətbiqi sənəti Dövlət Muzeyi, C.Cabbarlı adına Azərbaycan Dövlət Teatr Muzeyi, Azərbaycan İstiqlal Muzeyi və Azərbaycan Dövlət Din Tarixi Muzeyinin fondu.